АСТАНА, 13 маусым. Қазақстан мұсылмандары діни басқармасы дін қызметкерінің этикасын бұзған екі имамды жұмыстан босатты, деп хабарлайды баспасөз қызметі.
ҚМДБ-ның Атырау облысы бойынша өкілдігі аталған азаматтардың қызмет барысында сөз таластырып, келіспей қалғандығын анықтаған.
"Қазақстан мұсылмандары діни басқармасының баспасөз қызметі бұқаралық ақпарат құралдары мен әлеуметтік желі қолданушыларын 2017 жылдың 22 мамырында болып кеткен оқиға туралы объективті ақпарат беруге шақырады", — делінген хабарламада.
Айта кетейік, бұған дейін Атырау облысы Исатай ауданы "Зинеден ата" мешітінде ел алдында бас имаммен жаға жыртысқан наиб имамға сот айыппұл салды деп хабарлаған едік.
"Сот отырысында наиб имам өз кінәсін мойындап, бас имамнан кешірім сұрады. Сот үкімімен құқық бұзушы айыпты деп танылып, оған 10 АЕК көлемінде айыппұл салынды", — деген ақпарат таратқан еді Исатай аудандық сотының баспасөз қызметі.
