АСТАНА, 4 қаң – Sputnik. Қазақстанның басым бөлігінде өткінші суық күтілуде деп хабарлады "Қазгидромет".
Синоптиктердің айтуынша, жаңажылдық мереке күндері ауа температурасы Қазақстан аумағында нормадан 8-15ºС жоғары болды. Күндізгі температура +2ºС дейін көтерілді. Шығыс облыстарындағы жылы ауа-райы — бірінен соң бірі Батыс Сібір және Қазақстанның солтүстік аудандары арқылы өткен атлантикалық циклондармен байланысты болды.
"Кезекті циклон жақын арадағы тәуліктерде республиканың солтүстік жартысындағы ауа райына өз ықпалын тигізеді. Соған орай қар жауып, боран соғып, күшті батыс желі күтілуде", — делінген хабарламада.
Орталық Азиядан жылжыған циклон оңтүстік облыстарға жауын-шашын, тұман және көктайғақ әкеледі. Қазақстанға Архангельск ауданынан антициклон ауысып, 6-7 қаңтарда республиканың көптеген облыстарында өткінші суық тудырады деп қорытындылады "Қазгидромет".
