АСТАНА, 24 қаз — Sputnik. Қазақстандық теннисшілер Ярослава Шведова мен Юлия Путинцева дүйсенбі күні жаңартылған Әйелдер теннис ассоциациясы (WTA) жеке разряд рейтингінің алғашқы жүздігіндегі орындарын сақтап қалды.
Шведова 33-орынды иеленіп, елдің бірінші ракеткасы атағын сақтап қалды. Путинцева одан бір саты төмен келе жатыр. Екінші жүздікте Зарина Дияс 148-орында. Төртінші жүздікте Камила Керимбаева он саты жоғалтып, 324-орынды иеленді, Галина Воскобоева 373-орыннан 372-орынға көтерілді. Жеке разряд рейтингінде бірінші орында неміс теннисшісі Ангелик Кербер, екінші орында америкалық Серена Уильямс, үшінші орында – польшалық Агнешка Радьваньска.
Жұптық разряд рейтингінде Шведова 13-орында қалды. Воскобоева екінші жүздікте 170-шіден 171-орынға түсті. Путинцева төртінші жүздікте 334-орында қалса, Камила Керимбаева 353-тен 357-ге түсіп, Дияс төрт саты жоғалтып 362-ші болды.Әйелдер жұптық разряды бойынша рейтингтің басында үнді қызы Сания Мирза тұрса, екінші орынға – француз Каролин Гарсия көтерілді, үшінші орынға француз Кристина Младенович түсті.
