АСТАНА, 21 ақп — Sputnik. Өскемен қаласынан шыққан стилист Владимир Дубинин Парижде халықаралық шаштараздар байқауын жеңіп алды. Әділқазылар оны жылдың үздік шебері деп бағалады деп жазады өңірлік Аltaynews.kz басылымы.
Владимир бірнеше жылдан бері Мәскеуде жұмыс істеп жүр, өзінің жеке салоны бар. Алайда HCF Trophy International Hairdesign Contest конкурсында Қазақстанның намысын қорғады. 23 шаштараздың арасында топ жарған Владимир "Жоғары сән шаштаразы" атағына ие болды. Дубинин конкурс тарихында бұл марапатты екі рет жеңіп алған жалғыз стилист. Бірнеше жыл бұрын осы байқауда екінші орын алған болатын.
"Бәрі неге Қазақстанның атынан шықтың деп сұрап жатады. Айтпаса да, түсінікті ғой: мен Қазақстанның азаматымын, өз елімді, туған қалам – Өскеменді жақсы көремін, — дейді Владимир Дубинин. – Және мұндай дүбірлі додада өз елімнің намысын қорғау мен үшін үлкен мәртебе".
Үздік марапат пен атаққа ие болған Дубинин 2018 жылы HCF Trophy International Hairdesign Contest конкурсында әділқазылар қатарында болмақ. Сонымен қатар, L'Oreal Professional арналған шаш үлгілері топтамасын ұсынады.
