АСТАНА, 19 маусым — Sputnik. Өткен аптада жоғалған сегіз жасар қыздың денесі Атырау облысынан табылды, деп жазады "Мой город" басылымы.
"Ақ жайықтың" ақпаратына сәйкес, 14 маусым күні қала шетіндегі Бесікті ауылында жоғалып кеткен 8 жасар қыздың денесі 19 маусымда сағат 12.45-те Алмалы ауылының маңындағы Жайықтың оң жақ жағалауынан табылды.
Сәбидің денесі іздеу жүргізілген жерден жағалауға ағыс бойымен 3 шақырымға төмен жерге келгені туралы тілшіге таныс құтқарушы әңгімелеген.
— Біз сол жерге барғанда қыздың денесіне жайма жауып тастаған, туыстары оны таныды, — деп хабарлады дереккөз.
Іздестіріліп жатқан қыздың мүрдесінің табылғанын облыстық ІІД баспасөз қызметі растады. Сот-медициналық сараптама тағайындалды.
