АСТАНА, 4 қазан – Sputnik. Ақмола облысында екі автокөлік соқтығысып, жеті адам қаза тапты, зардап шеккендер бар, деп хабарлайды өңірдің ішкі істер департаменті Sputnik Қазақстан агенттігіне.
Жол апаты Атбасар ауданындағы Мариновка ауылына жақын жерде 3 қазанда болған.
"Мицубиси-Франтеро жүргізушісі қарсы бағыттық қозғалыс жолағына өтіп кетіп, ВАЗ-2106 көлігіне соғылған. Соқтығысу салдарынан ВАЗ-2106 жүргізушісі, оның әйелі мен екі қызы және тағы екі әйел қаза тапты. Екінші көлікте бір жолаушы қаза тауып, тағы бірі Атбасар орталық аудандық ауруханасына жатқызылған", — деп хабарлады полиция агенттікке.
Көлік апаты дерегі бойынша қылмыстық іс қозғалып, "Мицубиси" жүргізушісі уақытша ұстау изоляторына қамалды.
