АЛМАТЫ, 13 тамыз — Sputnik. "TRT" түрік телерадиокорпорациясының Астанадағы өкілдігінің директоры Абдулхамит Авшар "Қазақфильм" киностудиясында болып, қазақстандық кино туындыларын түрік телевидениесінде көрсетуге құқық алғысы келетіні туралы мәлімдеді.
Абдулхамит Авшардың сөзіне сүйенсек, корпорацияға тиесілі "TRT Avaz" арнасы түркі тілдес мемлекеттердің режиссерлері түсірген кинокартиналарды апта сайын көрсетіп отырмақшы.
"Қазір біздің мақсатымыз – сіздердің фильмдеріңізбен танысып, елдің тарихы мен мәдениетін көрсететін картиналарды таңдап алу", — дейді ол.
Өкілдік директоры атап өткендей, корпорацияны әр кезеңде әртүрлі жанрда түсірілген фильмдер қызықтырады.
"Қазақфильм" киностудиясы бұл ұсынысқа қызығушылық танытып, ынтымақтасуға әзір екендерін атап өтті.
"Қазір сіздерге қажетті форматта жаңа және ескі фильмдерді цифрлық нұсқада ұсына аламыз", — деді "Қазақфильм" киностудиясының аудиовизуалды жобаларының басшысы Олжабай Мұсабеков.
Иранда қазақстандық режиссердің ұсталу себептері анықталды
"TRT" телерадиокорпорациясы 1964 жылы бірнеше телерадиокомпаниядан құрылды. Қазірде әлемнің ондаған елінде қызмет етіп, әртүрлі тілдерде қызмет көрсететін көптеген халықаралық және өңірлік телерадиостанцияларға басшылық етеді.
