АСТАНА, 6 жел — Sputnik. Қазақстан президенті Нұрсұлтан Назарбаев Қазақстанда өндірілген бәтеңке киетінін айтып, барша отандастарын өзінен үлгі алуға шықырды.
"Қазжеңілөнеркәсіп-Алматы" ЖШС сәнді аяқ киім өндірісін іске қосу кезінде, ұлттық телекөпір барысында мемлекет басшысы осы өндірушілердің аяқ киімін киетінін айтты. "Мен сендердің аяқ киімдеріңді сатып алдым, аяғымды көтеріп, көрсетпей-ақ қояйын, бірақ мен сендердің бәтеңкелеріңді киіп отырмын", — деп мәлім етті Нұрсұлтан Назарбаев осы кәсіпорынның басшысына қарата.
Президент барша қазақстандықтарды "біздің жеңіл өнеркәсіпті қолдап, отандық тауарларды" сатып алуға шақырды. Сондай-ақ ол алматылық аяқ киім тігушілерге бәсекеге қабілетті болып, "итальяндықтар мен француздардың сапасынан кем болмауды" тіледі.
