Бозымбаев: Бензин Қазақстанда ғана қымбат емес

АСТАНА, 22 қаңтар – Sputnik. Энергетика министрлігі биыл Қазақстанда 90 пайыз отандық бензинмен қамтамасыз етпекші. Бұл туралы бүгін ведомство басшысы Қанат Бозымбаев мәлімдеді, деп хабарлайды Sputnik Қазақстан тілшісі. 

"Біз былтыр зауыттарда 14,9 миллион тонна мұнай өңдедік. Биыл 1,2 миллион тонна мұнай артық өңдейміз. Осылайша елімізді 90 пайыз отандық бензинмен қамтамасыз етеміз. Тек 10 пайызын сырттан импорттаймыз", — деді министр.  

Бозымбаевтың айтуынша, Қазақстанда бензин, БАҚ өкілдері жазатындай соншалықты қымбат емес. Жанармайды біздегіден де жоғары бағаға сататын бірнеше ел бар. 

"Сіздер сауатты журналиссіздер ғой. Дүниежүзінде сатылып жатқан бензин бағасын көрсететін көптеген сайт бар. Мәселен, сіздер (журналистер – ред. ескерт.) елімізде бензин өте қымбат деп жазасыздар. Мен таяуда бір агенттікті шолып шықтым.  Онда бензин бағасы бойынша 140 мемлекетпен салыстырғанда Қазақстан 14-13 орында тұр екен. Бізден де бензинді қымбатқа сатып жатқан 30 мемлекет бар. Біреулер бізді Еуропамен салыстыруға келмейді деп айтып жатады. Себебі кәрі құрлықта жалақы көлемі әртүрлі. Әрине, онда бізді Түрікменстанмен де, Иранмен де салыстыруға келмейді. Мұнай өңдейтін бизнес Қазақстанның ғана емес, бұл халықаралық бизнес", — деді Бозымбаев. 

Ведомство басшысы Қазақстанда жанар-жағармайдың резерв қорын құру туралы ұсыныс әзірленгелі жатқанын атап өтті. 

"Біз Қазақстанда бензин, дизель, авиакеросин өнімдерінің резерв қорын құру туралы Үкіметке ұсыныс дайындағалы отырмыз. Бұл мәселе пысықталып жатыр", — деп түйіндеді министр.