АСТАНА, 15 нау – Sputnik. Алматы облысында алаяқтықтың жаңа түрі ашылды, деп хабарлайды Алматы облысы ІІД баспасөз қызметі.
Алаяқтардың құрбандары егде кісілер.
"Өздерін мемлекеттік органдардың қызметкерлері деп таныстырған алаяқтар зейнеткерлерге 1 000 теңгелік банкноттарды ауыстыруды ұсынады. Одан кейін алдау жолымен оларды сувенир ақша белгілеріне ауыстырады", — деп хабарлады полицияда. Полицейлер тұрғындарды сақ болып, бейтаныс адамдардың күмәнді ұсыныстарына сенбеуге шақырады.
"Қандай да бір күдік туған жағдайда полицейлерге хабар беріңіз", — деп мәлім етті ІІД.
2017 жылғы 1 наурыздан бастап 2006 жылғы 1000 теңгелік банкноттардың айналымнан шыққаны туралы хабарланған. Аталған купюраларды кез келген коммерциялық банкте ауыстырып алуға болады.
