АСТАНА, 3 сәуір – Sputnik. Ақмола облысында үсіп өлген екі адамның денесі табылды, деп хабарлады Sputnik Қазақстан тілшісіне құқық қорғау органдарынан.
Астрахан ауданында егде әйел мен Шортанды ауданында ер адам үсіп кеткен.
"Астрахан ауданында 1947 жылы туған әйел фельдшерлік-акушерлік пункттің маңында, ал Шортанды ауданында 1976 жылы туған ер адам өлі күйінде өз үйінің ауласында табылды", — деп хабарлады құқық қорғау органының өкілі.
Табылған мәйіттерде күш қолдану белгілері жоқ. Сот-медициналық сараптама адамдардың үсіктен қайтыс болғанын көрсетіп отыр.
Өткен демалыс күндері Ақмола облысында түнде ауа температурасы 10-15 градус аяз болды.
Айта кетсек, 31 наурызда осы облыста жолда үсіп өлген ерлі-зайыптылардың мүрдесі табылған болатын.
