АСТАНА, 22 тамыз — Sputnik. Krysha.kz сайтында жарияланған ЭКСПО-ның басты ғимараты "Нұр Әлемнің" сатылуы туралы хабарлама бар болғаны қалжың, деп мәлімдеді "Колёса", "Крыша", "Маркет" өнімдер жөніндегі директоры Дмитрий Ботанов.
ЭКСПО павильонының сатылатыны жайлы хабарламаның әзіл екені көрініп тұр. Осы скриншотты алғашқы болып жариялаған паблик әлеуметтік желілерде танымал боламыз деп ойлаған шығар. "Крыша" сайтында мұндай хабарлама болған жоқ. Ол модератордан өтпес те еді. Меніңше, скриншоттан мұның фотошоп екені көрініп тұр. Жалған хабарламаның дизайны біздің сайттағы хабарламалардан ерекшеленеді. Мысалы, интерфейсте кейбір элементтер болмауы мүмкін ("В избранное" немесе "Оставить заметку" сияқты сілтемелер) немесе бос қалып қалған жерлер", — деп келтіреді басылым Дмитрий Ботановтың сөзін.
Әлеуметтік желілерде қазақстандық "Нұр Әлем" павильонының сатылымға шыққаны жайлы суреттер тарала бастады. Хабарламаның скриншоты "Крыша" сайтында, ал кейіннен әлеуметтік желілердегі түрлі топтарда пайда болды. Онда ғимараттың бағасы 433 миллиард теңге деп көрсетілген.
