Алматыда жеңіл көлік пен автобус соқтығысып, әйел мен бала зардап шекті

АСТАНА, 13 қыркүйек – Sputnik. Алматыда автобус пен екі жеңіл көлік соқтығысып, салдарынан екі адам зардап шекті, деп хабарлайды құқық қорғау органдары Sputnik Қазақстан агенттігіне.

Жол апаты Байтұрсынов және Тимирязев көшесінде болған. Оқиға куәгерлері мен автобус, Toyota Camry жүргізушілерінің айтуынша, Camry мен Mitsubishi Galant Тимирязев көшесімен батыс бағытта келе жатып, екеуі де Байтұрсыновқа бұрылмақ болады. 

Camry бұрылып үлгермей, тоқтап, автобусты өткізіп жібереді, ал Galant қоғамдық көлікке жол берместен, бұрыла бастаған.

Автобус жүргізушісі тоқтай алмай, бар жылдамдықпен Mitsubishi көлігін бір бүйірден соғады. Жол апаты салдарынан Galant жолаушылары – жүргізушінің әйелі мен баласы зардап шеккен, олар ауруханаға жатқызылды.