АЛМАТЫ, 5 қыркүйек — Sputnik. Астанада 4 қыркүйек күні түн жарымында болған жол-көлік оқиғасының салдарынан полицей көз жұмды.
Жол апатын видеоға түсіріп, Instagram-дағы Autolife_ast парақшасында жариялаған куәгерлердің айтуынша, оқыс оқиға Түркістан көшесінде болған.
"Dodge Керей-Жәнібекпен қатты жүріп өтіп, рөлге ие бола алмай, жол жиегінде тұрған полицейді қағып өтті. Кейін бордюрге шығып, шам бағанасын құлатып, өртеніп кетті", — деп жазды куәгер Instagram-да.
Дегенмен Астананың ІІД бұл ақпаратты растамады. Бастапқы тергеудің қорытындысы бойынша полицейді қақпаған, көлікте жолаушы ретінде отырғаны анықталды.
"Оқиға орнында шетел көлігінің 23 жастағы жолаушысы – Астана ІІД ЖПҚ жол-патрульдік полициясы полкінің қызметкері көз жұмды", — деп хабарлады ведомствоның баспасөз қызметі.
Dodge көлігінің жүргізушісі әр түрлі жарақат алып, ауруханаға жатқызылды.
Апат дерегі бойынша бірқатар сараптама тағайындалды. Сондай-ақ елордалық ІІД өзіндік қауіпсіздік басқармасы қызметтік тексеріс жүргізіп жатыр. Сотқа дейінгі тергеу басталды.
