23:26 19 Қараша 2019
Тікелей эфир
  • USD387.14
  • EUR428.18
  • RUB6.06
Архивтегі фото

Әкесі дүкеннен тұшпара сатып алған: Шымкенттегі трагедияның мән-жайы

© Sputnik / Алексей Куденко
Оқиға
Қысқа сілтеме алу
4559 0 0

Шымкентте бір отбасы тамақтан уланып, 2 бала көз жұмды. Мамандардың болжамынша, олар тұшпарадан улануы мүмкін

НҰР-СҰЛТАН, 5 қараша – Sputnik. Шымкент қаласында отбасы тамақтан уланып, ауруханаға түскенін хабарлаған едік. 4 жастағы және 11 айлық бала көз жұмды. Sputnik Қазақстан тілшісі трагедияның мән-жайын анықтап көрді.

Оқиға 3 қараша күні түнде болған. Әкесі дүкеннен тұшпара сатып алған. Кейін отбасы мүшелерінің іші ауырып, ауруханаға түскен. Мамандардың болжамынша, балалар тұшпарадан уланып қалуы ықтимал.

Отбасы "ауруханада жатпаймыз" деген қолхат қалдырған

Шымкент қаласы денсаулық басқармасының баспасөз хатшысы Лаура Мамырованың айтуынша, отбасы мүшелері 3 қараша күні таңғы сағат 4-те ауруханаға жеткізілген.

"Дәрігерлер балаларды тексеріп, "астан улануы мүмкін" деген диагноз қойды. Мамандар балаларды ауруханаға жатқызу туралы шешім шығарған. Алайда олар ауруханадан жатудан бас тартқан. Сөйтіп, үйлеріне кері қайтқан", - дейді ол.

Мамырованың айтуынша, отбасы мүшелері дәрігерлерге "ауруханада жатпаймыз" деген қолхат қалдырыпты. Бірақ таңғы 9:37-де отбасы қайтадан жедел-жәрдем қызметін шақырған.

"Кейін 2 бала мен 1 қыз ауруханаға түсті. 2015 жылғы бала жұқпалы аурулар ауруханасына ауыр жағдайда түсіп, сонда қайтыс болады. Ал 2018 жылы туған бала гибербариялық оксигинация орталығында көз жұмды. 2008 жылғы қыз осы орталықтағы токсикология бөлімінде ем қабылдап жатыр. Оның жағдайы тұрақты", - дейді баспасөз хатшысы.

Шымкентте бір отбасының екі баласы уланып көз жұмды

Сонымен қатар қалалық денсаулық басқармасы балалардың әкесі денсаулығына шағым түсірмегенін атап өтті.

Лаура Мамырова отбасы мүшелерінің неден уланғанын тек медицина сараптамасынан соң белгілі болатынын жеткізді. Оның пікірінше, сараптаманың қорытындысы 7-14 күнде шығуы мүмкін.

Газдан улануы мүмкін бе?

Балалар газдан улануы мүмкін деген де болжам бар. Алайда Шымкент қаласы төтенше жағдайлар департаментінің бас маманы Зарипа Тұрысбекова бұл жорамалды жоққа шығарды. Оның айтуынша, мамандар оқиға орнына 3 қараша күні сағат шамамен түскі 12:30-де барған.

"Отбасы жатақхана үлгісінде салынған көпқабатты пәтерде тұрған. Оқиға орнына 3 қызметкеріміз барды. Олар көршілермен және уланған балалардың әкесімен сөйлесті. "ҚазТрансГазАймақ" АҚ-ның Шымкент қаласындағы филиалының қызметкерлерімен бірге мұқият талдау жұмыстарын жүргіздік", - дейді ол.

Сондай-ақ Зарипа Тұрысбекова көпқабатты үйден газдың иісі шықпағанын атап өтті.

"Компания өкілдері дәліз бен пәтерден газдың исі шықпағанын анықтады. Біздің қызметкерлер де тексеріс жүргізіп, газдың таралу фактісін тіркеген жоқ. Бұл – кәсіби мамандардың жауабы", - дейді бас маман.

Істі полиция тергеп жатыр

Шымкент қаласы полиция департаментінің баспасөз хатшысы Әсел Сәденова екі баланың көз жұму фактісі тіркелгенін жеткізді. Қазіргі таңда тиісті сараптама тағайындалған.

"Отбасы мүшелерінің неден уланғанын анықтау үшін тиісті сараптама тағайындалды. Сондықтан әзірге олардың нақты неден уланғанын айта алмаймыз. Барлығы сараптаманың қорытындысынан соң белгілі болады. Біз тұшпараны тәркілеп алдық", - деді ол.

Әсел Сәденова сараптама жұмыстары қанша уақытты алатынын нақты айта алған жоқ. Тек бұл жұмыстың бір айға дейін созылуы мүмкін екенін жеткізді.

Тақырып бойынша

Үйлену тойында қонақтар жаппай уланды – қылмыстық іс қозғалды
Қарағандыда Өзбекстанның он алты азаматы уланып қалды  
Ажалы картоптан болды: Ақмола облысында төрт адам жертөледе көз жұмды
Үш адам қаза болды – Қарағандыдағы қайғылы оқиғаның мән-жайы
Павлодар облысында бірнеше бала уланып қалды
Кілт сөздер:
астан улану, Шымкент
Загрузка...

Басты тақырып