АСТАНА, 10 қаң — Sputnik. ҚР-ның БҰҰ жанындағы тұрақты өкілі болып тағайындалған Қайрат Омаров Ұйымның Бас хатшысы Антониу Гутеррешке сенім грамоталарын табыстады, содан кейін екі жақты форматта келіссөз жүргізді деп хабарлады ҚР сыртқы істер министрлігі.
Омаров пен Гутерреш ескі достардай кездесті. Салтанаттан кейін болған келіссөзде екі жақ бір-бірін жаңа лауазымымен құттықтап, БҰҰ-ның Қазақстанмен серіктесітігі одан әрі нығаятындығына сенім білдірді.
Қазақстан дипломаты ел басшылығының атынан Ұйымның жаңа басшысының қақтығыстарды тоқтату, бітімгерлік, тұрақты даму салаларындағы жоспарларына қолдау білдірді.
Бас хатшы 23 қарашада Астанада Нұрсұлтан Назарбаевпен кездесуін еске алып, Қазақстанның халықаралық аренадағы жетістіктеріне жоғары баға берді.
Гутерреш Қазақстанның әлемдегі барлық елдермен тығыз қарым-қатынастағы мемлекет ретіндегі беделін атап өтті. Оның айтуынша, бұл аймақтық қақтығыстарды реттеп, жаһандық қауіпсіздіктің негізгі мәселелерін шешуде үлкен рөл атқарады.
