АСТАНА, 14 қыркүйек — Sputnik. Астанаға Сирия жөніндегі келіссөздердің барлық қатысушылары келді, деп хабарлады ҚР Сыртқы істер министрлігінің баспасөз қызметі.
"14 қыркүйек күні Сирия жөніндегі Астаналық процестің алтыншы кезеңі басталады. Бүгінгі күні Қазақстан елордасына бұл келіссөздерге қатысатын барлық жақтың өкілдері келді", — дейді СІМ.
Ведомство мәліметтері бойынша Ресей делегациясын РФ президентінің арнайы өкілі Александр Лаврентьев бастап келді. Түркия мен Иран делегацияларын — Сыртқы істер министрінің орынбасарлары Седат Онал мен Джабер Ансари басқарып келді. Сондай-ақ БҰҰ Сирия жөніндегі арнайы өкілі Стаффан Де Мистура да келді. Американдық делегацияны таяушығыстық мәселелерді реттеу жөніндегі АҚШ мемлекеттік хатшысының көмекшісі м.а Дэвид Саттерфилд және СІМ саяси мәселелер жөніндегі кеңесшісі Науаф Уасфи Тель басқарған Иордания делегациясы да келіп жетті.
"Сонымен қатар, құрамында әртүрлі топтардан құралған 24 адам бар, сириялық қарулы оппозицияның өкілетті өкілдері де келді", — деп нақтылады баспасөз қызметі.
Алтыншы кездесу барысында бірқатар құжаттар қарастырылады деп күтілуде. Тараптар ЮНЕСКО Дүниежүзілік мәдени құндылықтары тізіміне енген, Сириядағы тарихи ескерткіштерді гуманитарлық сипатта минадан тазарту туралы ортақ мәлімдеме қабылдауды көздейді.