АСТАНА, 21 ақпан — Sputnik. Премьер-министр Бақытжан Сағынтаевтың үкіметі отставкаға кетті. Министрлер кабинетінің бұрынғы басшысы президентке алғыс білдіріп, қорытынды видеомәлімдеме жасады.
"Бүгін үкімет отставкаға кетті. Тәуелсіз Қазақстан мемлекетінің негізін қалап, бүгінгі биіктерге жеткізген Елбасы халқының өсіп-өркендеуін әрқашан ең басты қағида ретінде ұстанып, әрбір шешімін мемлекет пен халықтың мүддесі тұрғысынан қабылдап келеді", - деп атап өтті Сағынтаев.
Оның айтуынша, мемлекет құру оңай жұмыс емес, жас мемлекетті түрлі қайшылықтар мен қақтығыстардан аман алып өтіп, тарихи мөлшермен алғанда тым қысқа мерзімде осындай абыройлы ел ету шын мәнінде шексіз құрметке лайық.
"Елбасы еліміздің сан мың жылдық тарихындағы ең жауапты кезеңде халқымыздың бағына берген ұлы да жасампаз тұлғасы. Сол себепті халқымыз баянды бүгіні мен жарқын болашағын тек қана Елбасының есімімен байланыстырады", - деді үкіметтің бұрынғы басшысы.
Экс-премьер Сағынтаев өткен екі жарым жыл бойы үкімет тізгінін тапсырып, жоғары сенім білдіргені үшін президентке шынайы алғысын білдірді.
Естеріңізге сала кетсек, бейсенбі күні кешкісін Ақорданың ресми сайтында Нұрсұлтан Назарбаевтың мәлімдемесі, кейінірек видеоүндеуі жарияланды.
Мемлекет басшысы ел үшін маңызды – үкіметті отставкаға жіберу шешімін қабылдағанын мәлімдеді.
