НҰР-СҰЛТАН, 8 қазан – Sputnik. Қасым-Жомарт Тоқаев Урсула фон дер Ляйенге құттықтау жеделхатын жолдады, деп хабарлады Ақорданың баспасөз қызметі.
Мемлекет басшысы Еуропалық комиссияның сайланған президенті Урсула фон дер Ляйенді туған күнімен құттықтап, жеделхат жолдады.
Жеделхатта Еуропалық Одақ Урсула фон дер Ляйеннің басшылығымен өзінің іргетасын нығайтып, халықтың әл-ауқатын арттырып, халықаралық аренадағы мерейін арттыру жолында биік белестерді бағындырып, игі мақсат-мұраттарға жете беруіне тілектестігін білдірген.
Тағы оқыңыз: Қасым-Жомарт Тоқаевтың демалысы қалай өтті - видео
"Қазіргі таңда өңірдің тұрақты ілгерілеуі мен өркендеуі үшін Кеңейтілген серіктестік пен ынтымақтастық туралы келісім және ЕО-ның Орталық Азия бойынша жаңа стратегиясы неғұрлым берік байланыстардың жаңа дәуіріне жол ашуда. Алдағы жылдары Қазақстан мен Еуропалық Одақ арасында достық негізінде қалыптасқан жемісті қатынастардың одан әрі дами түсетініне кәміл сенемін", – деп жазды Қазақстан президенті.
Қасым-Жомарт Тоқаев Еурокомиссияның сайланған президентіне мол табыс пен сәттілік тіледі.
