АСТАНА, 15 қар — Sputnik. "Өскемен тәртіп" коммуналдық кәсіпорнының директоры қаланы қардан тазартуда қауқарсыздық танытқаны үшін қызметтен босатылды деп жазады жергілікті YK-news.kz басылымы.
Кеңейтілген аппарат жиналысында Шығыс Қазақстан облысы әкімі Даниал Ахметов қала басшысы Ерлан Аймұқашовтан көшелерді қардан тазарту жөнінде есеп беруді сұрады. Сонымен қатар, 28 қазан күні "Өскемен тәртіп" кәсіпорнының директоры Денис Федченконың "қысқа дайынбыз" деп мәлімдегенін атап өтті.
Өскемен қаласының басшысы Аймұқашов бұл мәліметтің жалған екенін айтқан, ал міндетін дұрыс атқара алмаған Федченко қызметтен босатылды.
"Қазір кәсіпорынды басқа бір адам басқарады. Шын мәнісінде, қар күрейтін 111 көлік бар. Біз қосымша 40 көлік жұмылдырдық. Дүйсенбі күні бір тәулік ішінде 150 мм қар шығарылды: күндіз – 82, түнде 69. Барлығы 6700 куб метрден астам қар күрелді. Бұдан әрі де осындай қарқынмен жұмыс істемекпіз", — деп есеп берді қала әкімі.
Даниал Ахметов Өскемен мен Семей әкімдеріне қалаларды қардан тазартуды тәулік бойы үзбеуді тапсырды.
