"Қазақстан аумағынан суық фронттарды шығысқа қарай ығыстырған антициклонның ықпалымен еліміздің басым бөлігінде демалыс күндері ауа райы ала бұлтты әрі жауын-шашынсыз болады. Тропосфералық ағындардың солтүстіктен оңтүстік-батысқа қарай ығысуы батыс облыстарда күннің жылынуына алып келді. Демалыс күндері қалған аумақта да ауа райы жылынып, температура әдеттегі нормадан 3-7ºС-қа жоғарылайды", — деп хабарлады "Қазгидромет" инженер-синоптигі Саида Бердібекова.
Батыс Қазақстандағы жайма-шуақ күндер ұзаққа созылмайды. Жексенбі күні Ресейдің еуропалық бөлігінен жаңбырлы әрі желді циклон келеді.
Елорда тұрғындарын алдағы үш күнде жауын-шашынсыз ауа райы қуантпақ, температура 11-13 градусқа дейін жоғарылайды. Алматыда демалыс күндері 10-17 градус жылы болады.
