АСТАНА, 27 мамыр — Sputnik. Алматы облысында полиция есірткі сатушылар тобын анықтап, құрықтады, деп хабарлайды өңірдің ішкі істер департаменті баспасөз қызметі.
Өңірдегі есірткі тасымалдау каналдарын анықтауға бағытталған жедел шаралар Текелі және Талдықорғанда жүргізілген. Нәтижесінде полицейлер есірткі сатумен айналысатын жерлерді анықтап, сатушыларды қолға түсірді.
"Бұл бірнеше сату орны бар ірі сауда желісі болып шықты. Текеліде үш мекенжайы анықталды, ол жерде өсімдіктен өндірілген есірткілер сатылған. Оларды сатып таратумен айналысқан күдіктілер қамауға алынды. Күдіктілерден бір жарым килограмм марихуана алынып, қылмыстық өндірістің материалы ретінде берілді", — деп хабарлады полиция.
Жыл басынан бері өңірде 54 есірткі сатушы жауапкершілікке тартылды.
