АСТАНА, 3 қыркүйек — Sputnik. Алматы-Қапшағай тас жолында әйел адам Toyota Town Ace микроавтобустың астына түсіп, алған жарақаттар салдарынан оқиға орнында көз жұмды, деп хабарлайды Sputnik Казахстан.
Өлімге әкеліп соққан жағдай Алматы-Қапшағай тас жолының 20-шақырымында Ынтымақ ауылының бұрылысына қарама-қарсы жерде болды.
Алдын ала мәліметтерге сәйкес, 48-жасар әйел адам тас жолдың бойын тиісті емес жерден кесіп өтпек болған. Оң жақ бетте жүріп келе жатқан, Renault автокөлігі жаяу жүргіншіні байқап қалып, тоқтайды. Ал жолдың сол жақ бетіндегі Toyota Town Ace микроавтобусының жүргізушісі дер кезінде тоқтап үлгермей, жүргіншіні бар жылдамдықта соғып кетеді.
Соққының салдарынан зардап шеккен әйелді метал қоршаудан қарсы беттегі жол қозғалысына лақтырып жібереді. Оқиға орнынан микроавтобустың тоқтау бағытының қашықтығы 70 метрді құрады.
Жол апаты фактісі бойынша тексеру жүргізіліп, барлық жағдайлар ескеріліп жатыр.
