АСТАНА, 17 қараша — Sputnik. Қарағандыда жол апатынан жарақаттануға қатысты ерекше акция өтті, деп хабарлайды облыстың жергілікті полиция қызметі.
Акцияны полицейлер мен Қызыл крест және қызыл жарты ай халықаралық қозғалысының Қарағандыдағы филиалының мамандары ұйымдастырды. Олар қарағандылықтардың зардап шеккендерге алғашқы көмек көрсете алатынын не алмайтынын тексерді.
Акция қатысушылары халық көп жүретін көшелердің бірінде жол апатынан жараланған кейіп танытты. Айнала қан, жаралы адамдар – бәрі нағыз жол апатына ұқсады. Еріктілер «оқиға орнына» гриммен келді, жеңіл көліктегі жолаушылардың бірінің «аяғы сынған», қалғандары жаралы.
"Еріктілердің бірі жол жиегінде көмек сұрап, көлік тоқтатуға тырысты. Алайда жүргізушілер "жаралы" адамдарды көргенімен тоқтамастан жүріп кетті. Кейбірі терезеден "полицейлерді шақыр, олар көмектеседі" деп айғайлаған. Әлуметтік желіде көбірек "лайк" жинау үшін "жол апатын" камерасына түсіріп алғандар да кездесті", — делінген хабарламада.
Полицейлер алғашқы 15 минутта медициналық көмек өте маңызды екенін атап өтті. Жүргізушілердің дені автомектепте оқып жүрген кезінде алғашқы көмек көрсету курсынан өткенімен, акция барысында бәрі немқұрайлылық танытты.
