АСТАНА, 25 желтоқсан – Sputnik. Көкшетауда автокөлік жүргізушісі бұрынғы сүйіктісін қасақана қағып өткен, әйел сол жерде көз жұмды, деп хабарлады Sputnik Қазақстан ішкі істер департаментінен.
Облыс орталығының ішкі істер басқармасына бүгін сағат таңғы тоғыздың шамасында серіктестік директоры қоңырау шалып, фирма аумағында BMW X5 көлігінің жүргізушісі мекеменің 37 жастағы бухгалтерін қағып өлтіріп, оқиға орнынан қашып кеткенін айтқан.
Ер адам көз жұмған әйелмен бұрын бірге тұрғаны анықталды, араларында бала болмаған. Әйелдің артында 14 жасар ұлы қалды.
Полицияның болжамынша, күдікті бұрынғы ғашығын күтіп отырып, жұмысқа келген бетте қасақана соғып өткен.
Құқық қорғаушылар автокөлік иесін уақытша ұстау абақтысына қамады. Оған қарсы "Кісі өлтіру"бабы бойынша қылмыстық іс қозғалды.
