АСТАНА, 15 қаңтар — Sputnik. Жаңа босанған аналар енді перзентханадан шықпай тұрып баласының туу туралы куәлігін рәсімдей алады, деп хабарлады Атырау облысының өңірлік коммуникациялар қызметі.
Ол үшін egov.kz сайтына тіркелу керек. Сонда бала өмірге келісімен оның ата-анасына SMS-хабарлама арқылы құттықтау келіп, аталмыш мемлекеттік қызмет түрі ұсынылады.
Омар Нұрбекұлының анасы Жайдар Ибатоллақызы облыстық перинаталды орталықтағы проактивті әдісті алғаш болып пайдаланып көрді. Тұңғыштарының куәлігін алуға сәбидің әкесі Нұрбек те арнайы келіпті.
Айта кетейік, бұл пилоттық жоба "Азаматтарға арналған үкімет" мемлекеттік корпорациясы "Ұлттық ақпараттық технологиялар" акционерлік қоғамының проактивті әдісі аясында жүзеге асып отыр. Бүгінде бала туғаннан кейін ата-аналар баланы тіркеу, куәлік алу, жәрдемақы тағайындау және балабақшаға кезекке қою үшін халыққа қызмет көрсету орталықтарына баруы тиіс болатын.
Енді проактивті қағидаттың іске қосылуына байланысты фронт-офистерге барудың, тіпті электрондық үкімет порталына жүгінудің де қажеті жоқ. Рәсімделген соң оған смс хабарлама келеді.
Ата-ана халыққа қызмет көрсету орталығына баланың куәлігін алып кету үшін ғана барады немесе үйге жеткізу қызметін пайдалануға да мүмкіндігі бар.
