АСТАНА, 5 сәуір — Sputnik. Ақмола облысында автобус аялдамасынан ер адамның мәйіті табылды, қылмысты жасады деген күдікті ұсталды, деп хабарлайды ішкі істер департаментінің баспасөз қызметі.
Көптеген соққы ізі бар ер адамның мәйіті 3 сәуір күні Бурабай ауданы аумағынан, Жарқайың ауылына жақын маңнан табылған. Қаза болған адамның кім екені белгілі болды, ол Солтүстік Қазақстан облысындағы Тайынша ауданының 49 жастағы тұрғыны болып шықты.
Құқық қорғау органдарының қызметкерлері шаруа қожалығы басшысының 40 жастағы туысы марқұмды ұрлық жасадың деп кінәлап, ұрып өлтіргенін анықтады. Содан кейін оны қожалықтан алып кетіп, аялдамаға апарып тастаған.
Қазіргі таңда ҚР ҚК 106-бабы 3-бөлігі бойынша сотқа дейінгі тергеу жүргізіліп жатыр. Күдікті уақытша ұстау абақтысына жабылды.
