АСТАНА, 9 сәуір — Sputnik. Ақмола облысында әйел адам өз-өзіне қол салмақ болған, полиция қызметкері оны райынан қайтарды, деп хабарлайды өңірдің ішкі істер департаменті баспасөз қызметі Sputnik Қазақстан агенттігіне.
8 сәуірде Есіл ауданында полиция старшинасы Асылхан Абдуллин кезекшілікте жүрген болатын.
Жақсы-Есіл-Бузулук жолында сағат 14:00 кезінде полицей теміржол үстімен өтетін көпірдің шетінде тұрған әйел адамды байқайды. Старшина көлігін тоқтатып, әйелге ақырын жақындап, әңгімелесе бастаған.
"Жас келіншек жылап, күйеуімен ренжісіп қалғанын, үйіне қайтқысы келмейтінін, өз-өзіне қол салғысы келетінін айтты. Бірнеше минут бойы әйелмен сөйлескен полицей, оны тыныштандырып, райынан қайтарған", — делінген хабарламада.
Тәртіп сақшылары 35 жастағы әйелді ішкі істер бөліміне апарып, кейін үйіне жеткізіп салды әрі жұбайымен профилактикалық әңгіме жүргізген.
