Шымкент, 11-желтоқсан – Sputnik. "Ташкент-Түркістан" бағытындағы халықаралық автобус Түркістан қаласынан жүре бастады, деп хабарлайды Sputnik Қазақстанның өңірдегі тілшісі.
"Халықаралық автобус бағытын ашудағы мақсат – екі ел арасындағы сауда-экономикалық, туристік қатынастарды нығайту. Автобус бағытын қазақстандық "Бақдәулет Сервис" жауапкершілігі шектеулі серіктестігі мен өзбекстандық "Узавтотранс" мекемесі жүргізеді", — делінген хабарламада.
Автобус бағытының жалпы қашықтығы — 335 шақырым, жолға кететін уақыт – 6 сағат 40 минут. Екі бағытта күнделікті 2 автобус қатынайды. Жол ақысы Түркістаннан 2 мың теңге болса, Ташкенттен 50 мың сом мөлшерінде.
Естеріңізге сала кетейік, қарашаның 15-і күні Шымкентте алғаш рет екі ел арасындағы қарым-қатынасты дамытуға бағытталған өңіраралық ынтымақтастық форумы өтті. Онда туризм саласын дамытуға аса мән берілген.
