НҰР-СҰЛТАН, 9 сәуір – Sputnik. Алматыда карантинді сақтау мақсатында полиция қоғамдық көліктің жолаушыларын тексеріп жатыр.
Тәртіп сақшылары алматылықтардың карантин режимі кезінде қала ішінде жүруіне рұқсаты бар-жоғын планшет арқылы тексеріп жатыр, деп хабарлайды Polisia.kz.
Айта кетейік, Алматыда 7 сәуірден бастап қала ішінде жүруге арналған құжаттар мен анықтамалардың күші жойылды. Қалада карантин кезінде жұмысын жалғастыратын кәсіпорындардың электронды деректер базасы құрылды.
Оқи отырыңыз: Алматыда қала ішінде жүруге арналған рұқсат қағаз берілмейтін болды
Базаға қаланың тыныс-тіршілігін қамтамасыз ететін медицина, құқық қорғау, коммуналдық қызмет, БАҚ өкілдері, такси және жеткізу қызметтері мен мемлекеттік орган қызметкерлері енгізілді.
"Әр азаматтың деректері электронды түрде тексеріледі. Ақпарат болмаған жағдайда, шұғыл қажеттіліксіз көшеге шығуға шектеу енгізілгенін ескертеміз", – деді Алматы қаласы ПД басшысының бірінші орынбасары Нұрлан Алмасбеков.
Ол Қазақстан Әкімшілік құқық бұзушылық туралы кодексінің 476-бабына сәйкес талаптар түсіндірілетінін атап өтті. Бұл шаралар карантиндік режим аяқталғанға дейін өткізіледі.
