Өңірлер

Алматының ірі базарында саудагерлер мен күзетшілер жұрттың зәресін ұшырды

© AP Photo / Mikhail MetzelРынок, архивное фото
Рынок, архивное фото - Sputnik Қазақстан
Жазылу
Дауласып қалған екі топ мәселені суық қарумен шешпек болған. Бұл кикілжіңге қатысты базар әкімшілігі тіс жармады

НҰР-СҰЛТАН, 30 мамыр – Sputnik. Алматының қақ ортасындағы Сары Арқа базарында тапа тал түсте атыс болды.    

Деректерге қарағанда саудагерлер мен базар күзетшілері автотұраққа таласып қалған, деп хабарлады "Астана" арнасы.

Куәгерлердің айтуынша дауласып қалған екі топ мәселені суық қарумен шешпек болыпты. Пышақтан кейін күзетшілер мен саудагерлер қолдарына тапанша алған. Сөйтіп олар бірін-бірі Ұлықбек көшесіне дейін тырқыратып қуған. Абырой болғанда, зардап шеккендер жоқ.

Оқи отырыңыз: Алматының базарында саудагерлер жаппай төбелесті – видео

Бұл кикілжіңге қатысты базар әкімшілігі тіс жармады. "Іс - құқық қорғау органдарының құзырында" деп құтылды. Саудагерлер де ақ-қарасын ашып айтпады. Жаппай төбелеске қатысқандар сол күні ұсталды. Пышақ ұстаған да, тапанша асынған да уақытша оқшалау абақтысында отыр.  

"Бұл фактіні Әуезов аудандық ПБ Қазақстан Қылмыстық кодексінің 293-бабы 3-бөлігі бойынша тергеп жатыр. Қылмыс құралы – газ тапаншасы тәркіленіп, сот-баллистикалық сараптамаға жіберілді. Атыстың салдарынан жарақат алғандар жоқ", - деп атап өтті қалалық полиция департаментінің ресми өкілі Салтанат Әзірбек.

Зардап шеккендер болмағанның өзінде бұзақылар заң алдында жауап береді. Өзгелердің өміріне қауіп төндіргендер 3-тен 7 жылға дейін бас бостандығынан айырылуы мүмкін.

Жаңалықтар
0