АСТАНА, 21 ақпан — Sputnik. Астанада міндетті салық төлеуден қашып жүрген жалға берушілерді анықтау жұмыстары жүргізіледі деп хабарлады қала әкімшілігі баспасөз қызметі.
Ведомство мәліметінше, Астанада 289 мың пәтер ресми түрде есепке алынған, олардың 9,3 мыңы, яғни 4%-ы заң жолымен жалға беріледі. Алайда, мамандардың айтуынша, бұл деректер мен шынайы көрсеткіштердің арасы тым алшақ: елордада баспаналардың шамамен 10%-ы жалға беріледі, демек 400 миллион теңге көлеңкелі айналымда жүріп жатыр. Әкімшіліктегілердің пікірінше, жалға берілетін есепке алынбаған пәтерлер қылмыскерлер үшін таптырмас алаңқай болмақ.
"Осы мәселені шешу үшін жоба аясында "Бөлімше" жедел-профилактикалық шарасы жүргізілетін болады. Оған ішкі істер органдарының қызметкерлері ғана емес, мемлекеттік кірістір және тұрғын үй инспекциясы органдары да қатысады", — делінген хабарламада.
Олардың басты мақсаты міндетті салық төлеуден қашқақтап жүрген жалға берушілерді анықтау болып табылады.
