АСТАНА, 15 маусым — Sputnik. Венгриялық саяхатшылар Ласло Цако мен Иштван Бенезе Қазақстанды көріп, халықтардың мәдениетін насихаттау үшін Ақтаудан Астанаға дейінгі 2,5 мың километрден астам қашықтықты атпен жүріп өтпекші, деп хабарлайды "Лада" жергілікті басылымы.
Туристер венгр ұлттық киімімен саяхаттап жүр, олардың мақсаты екі елдің қарым-қатынасын нығайту.
"Қазақстан мен Венгрия — бауырлас халықтар. Біз қарым-қатынасымызды нығайтып, осы таңғажайып ел табиғатының сұлулығын тамашалап, өз мәдениетімізді танытқымыз келеді. Сол себепті көлікке емес, атқа мініп саяхаттаймыз. Оның үстіне, ата-бабаларымыз көне заманнан бері ат құлағында ойнаған. Біз XI ғасырдағы венгр ұлттық киімін киіп жүрміз. Бұл дәстүрді халыққа неғұрлым көбірек көрсеткіміз келеді", — деді Иштван Бенезе басылымға берген сұхбатында.
Саяхатшылар алыс сапарға атпен алғаш рет аттанып отырған жоқ — Иштван Бенезе 2010 жылы Алматыдан Будапештке дейін атпен барған, ал 2012 жылы — Будапешттен Астанаға дейін.
