АСТАНА, 21 маусым — Sputnik. "ЭКСПО-2017" халықаралық көрмесі аумағына кірерде, бақылау-өткізу пунктінде оқ салынған полиэтилен пакет табылды, деп хабарлады Астана ішкі істер департаменті баспасөз қызметі.
Полицейлер пакетті 20 маусым күні 11:00-де тапқан. Бақылау камераларының көмегімен күдікті, Қарағанды облысының 22 жастағы тұрғыны ұсталды.
Аталған дерек ҚР ҚК 287-бабы бойынша сот алды тергеулердің Бірыңғай реестріне тіркелген. Сарапшының қорытындысы бойынша, оқтар зауытта жасалған, иір ойықты аңшы мылтығына арналған. Тергеу ісі басталды.
Полиция атап өткендей, көрме аумағына оқ ататын, травматикалық, газ және суық қару, өткір немесе кесетін құралдар, радиоактивті материалдар, улы, күйдіргіш, бояғыш, тотықтырғыш заттар мен органикалық тотықтар, тұтанғыш және пиротехникалық бұйымдар, жанармай түрлерін, литий — ионды аккумуляторлар (гироскутерлер және т. б.) немесе тұтанатын басқа да заттар алып кіруге тыйым салынған.
