АСТАНА, 26 шілде – Sputnik. Қазақ сөздерін аудару кезінде бәріне ортақ, әмбебап латын әліпбиін қабылдау – арнайы комиссияның 2017 жылы орындауға тиісті басты тапсырмасы, деп санайды Қазақстанның білім және ғылым министрі Ерлан Сағадиев.
"Биыл орындалуы тиіс мәселе – бәріне ортақ, әмбебап әліпби қабылдау. Бірнеше нұсқасын әзірлеп, оларды талқылап, бірін таңдауымыз керек", — деді Сағадиев Астанадағы брифингте қазақ тілін латын әліпбиіне көшіру туралы сұраққа жауап беріп. Ол "бұл жобаның аса маңызды екенін, ең бастысы, мұқият болып, ағаттық жібермеу керектігін" атап өтті.
Әліпби қабылданған соң, қазақ тілін латын әліпбиіне көшіру туралы жұмыс жоспары әзірленеді, дейді министр. Оның айтуынша, қазақ тілін латын әліпбиіне көшіру үшін арнайы құрылған комиссия "осы бағытта жұмыс істеп жатыр".
