АСТАНА, 4 қыркүйек — Sputnik. ҚР денсаулық сақтау министрі Елжан Біртанов Астанада "Абу-Даби Плаза" құрылыс алаңындағы жаппай төбелес салдарынан зардап шеккендердің жағдайы туралы айтып берді.
"Науқастардың жағдайы қанағаттандырарлық. Бірнеше адам зардап шеккен болатын – Қазақстан мен Үндістан азаматтары. Жалпы айтқанда, ауыр жарақат алғандар жоқ. Екеуі ауруханаға жатқызылды – біреуі қазақстандық, екіншісі Үндістан азаматы. Денесі сырылып, көгерген, бассүйек-ми жарақатын алған", — деді Біртанов ҚР Парламенті палаталарының біріккен отырысы алдында тілшілерге.
2 қыркүйек күні кешкісін "Абу-Даби Плаза" құрылыс алаңының бақылау-өткізу бекетінде күзет компаниясы қызметкерлері мен Үндістаннан келген жұмысшылар арасында жанжал туындады. Жаппай төбелес салдарынан бірнеше адам зардап шегіп, ауруханаға жатқызылған.
Жаппай төбелестен кейін оқиға орнында қоғамдық тәртіп бұзған 40-тан астам адам полицияға жеткізілді. Олардың сегізі әкімшілік жауапкершілікке тартылған, қалғандары профилактикалық әңгіме жүргізілгеннен соң босатылды.
