АСТАНА, 7 қараша – Sputnik. Бүгін Астанада өткен "Жаңа әліпби – жаңғыру жолы" атты дөңгелек үстелде ҚР Мәдениет және спорт министрлігі Тілдерді дамыту және қоғамдық-саяси жұмыс комитеті төрағасының орынбасары Ғалымжан Мелдешов жаңа әліпби бойынша ұлттық комиссия қашан құрылатынын айтты, деп хабарлайды Sputnik Қазақстан тілшісі.
Министрлік өкілі латын әліпбиіне көшу бойынша үкімет тарапынан атқарылып жатқан жұмыстарға тоқталды.
Мелдешов латын әліпбиіне көшу жұмыстарын жүзеге асыру әзірге үш кезеңге бөлініп отырғанын айтты.
"Бірінші кезең – 2018-2020 жылдар, нормативтік-құқықтық базаны жетілдіру жөніндегі іс-шаралар жүзеге асырылады. Екінші кезең – 2021-2023 жылдар аралығы, инфрақұрылым жасау жөніндегі шаралар. Үшінші кезең – 2024-2025 жылдар, бұл мерзімде ұйымдастырушылық жұмыстар іске асады. Бұл әзірге жоба, нақты қатып қалған кезең деп айту әлі ерте. Өйткені, 14-ші немесе 16 қарашада жұмысшы тобының кезекті отырысы өтіп, үкімет тарапынан латын әліпбиіне көшу жөніндегі ұлттық комиссияның құрамы бекітіледі. Комиссия құрамына бүкіл мемлекеттік органның өкілдері, лауазымды тұлағалар, халықтың ортасында жүрген блогерлер мен елдің болашағына, әліпбиге жаны ашитын басқа да азаматтар тегіс жиналады. Осы бағытта тиісті жұмыстар жүзеге асып жатыр", — деп түйіндеді Мелдешов.
