АСТАНА, 20 желтоқсан — Sputnik. Биыл Астанада көші-қон бойынша халыққа қызмет көрсету орталығы ашылады, деп хабарлайды Sputnik Қазақстан тілшісі.
"Биыл Астанада көші-қон қызметтерін көрсететін ХҚКО және Көкшетау мен Семейде автокөліктерді тіркеу және жүргізуші куәлігін беру қызметін көрсететін фронт-офистер ашамыз. Ал келесі жылдың басында Орал мен Атырау қалаларында да дәл сондай мамандандырылған ХҚКО ашуды жоспарлап отырмыз", — деді "Азаматтарға арналған үкімет" мемкорпорациясының басқарма төрағасы Абылайхан Оспанов үкімет отырысында.
Жыл соңына дейін іске қосылатын көші-қон бойынша ХҚКО-да құжаттарды қабылдау мен тіркеу қызметтерін "Азаматтарға арналған үкімет" мамандары көрсетеді. Нәтижесінде көші-қонға байланысты мемлекеттік қызметтер "бір терезе" қағидаты бойынша бекітілген стандартқа сай ұсынылмақ.
Айта кетсек, қазіргі таңда мемлекеттік корпорация аясында Қазақстан бойынша 349 фронт-офис пен 637 бэк-офис, 12 мамандандырылған ХҚКО, 70 мобильді ХҚКО жұмыс істейді.
