АСТАНА, 25 желтоқсан — Sputnik. Қазақстанда екі мыңнан астам мемлекеттік қызметшінің әлеуметтік желідегі жеке парақшаларында ішімдік, балағат сөз бен эротикалық суреттер табылған.
Ведомство хабарлағандай, мемлекеттік органда жұмыс істейтін қызметкерлердің 54 745 жеке парақшасы тексеріліпті. 2212 жұмысшының парақшасында мазмұны нормаға сай келмейтін 2300 сурет, 21 видео мен 46 комментарий анықталған.
"Суреттер мен видеода мемлекеттік қызметшілер ойын-сауық мекемелерінде ішімдік ішіп, балағат сөз айтқан, бейәдеп сөздерге толы мәтіндер мен эротикалық сипаттағы және қарумен түскен суреттер жариялапты. Кей суреттер құмар ойындар мен букмекерлік ұтыс тігуге қызығушылықтарын көрсетеді", — деп хабарлады жемқорлыққа қарсы агенттік.
Ведомство әлеуметтік желілерді ғана емес, мемлекеттік қызметшілердің кімнен қандай сыйлық немесе басқа да марапаттау алғанын бақылап отырады.
