АСТАНА, 25 қаңтар — Sputnik. Астанада жұма, 26 қаңтарда мектеп оқушылары мен колледждің 1-2 курс студенттері үшін сабақ болмайды, деп хабарлайды Астана қалалық білім басқармасы.
"26 қаңтарда ауа райының қолайсыздығына байланысты қала мектептерінің бірінші және екінші ауысымындағы 0-11 (12) сынып оқушылары және колледждердің 1-2 курс студенттері үшін сабақ болмайды", — деп жазылған хабарламада.
Айта кетейік, ауа райының қолайсыздығына байланысты сабақтың болмауы каникул күндеріне әсер етпейді – каникул бекітілген мерзімде беріледі.
Бағдарламадан қалмас үшін мектептерде арнайы шара ұйымдастырылған.
"Оқу бағдарламасын толығымен орындау мәселесі білім беру басқармасының бақылауында. Қаланың ауа райын ескерсек, мұндай жағдай жыл сайын қайталанып тұрады, біз оған дайынбыз", — дейді басқарма мамандары.
