АСТАНА, 11 маусым — Sputnik. "Қазақстан темір жолы" ұлттық компаниясына қарасты "Кедентранссервис" АҚ вице-президенті Ғалым Мұқанов пен сатып алулар және келісімшарт жұмыстарын ұйымдастыру басқармасының басшысы Дулат Уваев тұтқынға алынды, деп хабарлады Астана қалалық сотының баспасөз қызметі.
Компания басшыларын Сыбайлас жемқорлыққа қарсы іс-қимыл ұлттық бюросы пара алғаны үшін ұстап, тергеу абақтысына қамаған.
"Астана қаласы Есіл ауданы №2 аудандық сотының 2018 жылдың 8 маусымындағы қаулысымен Ғалым Қасқырбайұлы Мұқанов пен Дулат Серікұлы Уваевқа қатысты екі айға дейінгі мерзімде, яғни 2018 жылдың 6 тамызына дейін қамауда ұстау түрінде бұлтартпау шарасы санкцияланды", – деп түсініктеме берді сот.
Компания басшыларының кінәсі дәлелденсе, параның 70 еселенген көлемінде айыппұл төлеуі немесе бес жылға дейін бас бостандығынан айырылуы мүмкін.
