АСТАНА, 22 желтоқсан — Sputnik. Мемлекеттік қызметшілерге сыйлық жасаған қазақстандықтарға ірі көлемде айыппұл салынды, деп хабарлайды Sputnik Қазақстан.
Желтоқсандағы мерекелердің қарсаңында Солтүстік Қазақстан статистика департаментінің екі қызметкеріне екі торт сыйлаған ер адамға да осынша айыппұл салынды. Әрбір тәтті "рахметтің" құны үш мың теңгеден аспайды, деп хабарлады мемлекеттік қызмет істері және жемқорлыққа қарсы іс-қимыл агенттігінің баспасөз қызметі.
Қандай сыйлық үшін қылмыстық жауапқа тартылуыңыз мүмкін?
Жемқорлыққа қарсы күрес ведомствосы жаңа жыл қарсаңында қазақстандықтарды мемлекеттік қызметшілерге "рахмет" айтудан бас тартуға шақырды. Егер сыйлықтың құны 2 айлық есептік көрсеткіштен (4810 теңге) асып түссе, "рахмет" айтушы азамат қылмыстық жауапкершілікке тартылуы мүмкін.
"Бір қарағанда сыйлық жасау зиянсыз болып көрінгенімен, оның жемқорлықтың көрінісі ретінде қоғамдық қаупі бар. Бұл биліктің абыройына нұқсан келтіріп, қоғам алдында беделін түсіреді", — деп есептейді мемлекеттік қызмет істері жөніндегі агенттіктегілер.
Мемлекеттік қызметшіге заңсыз сый жасаған адамға, егер қылмыстық жазаланатын әрекет болмаса, 200 айлық есептік көрсеткіш (481 000 теңге) көлемінде айыппұл салынады. Ал заңсыз сый алған лауазымды тұлға 600 АЕК (1 443 000 теңге) айыппұл төлейді.
Егер сыйлық беру немесе алу оқиғасының куәгері болсаңыз, тәулік бойы жұмыс жасайтын 1424 нөміріне хабарласа аласыз. Сонымен қатар, азаматтар агенттік төрағасының ресми блогына хат жазып қалдыра алады.
