АСТАНА, 18 ақпан – Sputnik. Екатеринбург маңында бес адамның өмірін қиған жол апатына себепші болған Қазақстан азаматын қамауда ұстау мерзімі 1 сәуірге дейін ұзартылды. Бұл туралы сыртқы істер министрлігі баспасөз қызметінің жетекшісі Айбек Смадияров мәлімдеді, деп хабарлайды Sputnik Қазақстан тілшісі.
Өткен жылдың 29 қарашасында Екатеринбург қаласының маңында ірі жол апаты болған еді. Қазақстан азаматы жүргізген жүк көлігінің тіркемесі қарсы бетке шығып кетіп, үш көлікпен соқтығысқан. Соның салдарынан Ресейдің бес азаматы қаза болды.
"Қазіргі таңда қазақстандық Челябі облысының Касли қаласында тергеу изоляторында отыр. Оны қамауда ұстау мерзімі 1 сәуірге дейін созылды",- деді Смадияров апта сайынғы брифингте.
Белгілі болғандай, жүргізуші – Түркістан облысының тумасы.
"Біздің консул оған консулдық және құқықтық мәселелер бойынша консультациялар беріп жатыр", - деді баспасөз қызметінің жетекшісі.
