АСТАНА, 21 ақпан – Sputnik. Сенат депутаты Дариға Назарбаева қоғамның назарын аударған оқиғаларды үнемі бақылап отыратынын жеткізді, деп хабарлайды Sputnik Қазақстан тілшісі.
Отырыстан шыққан сенатор журналистерге әлемдегі және Қазақстандағы жаңалықтарды үзбей оқып отыратынын айтты. Сонымен қатар ол жағымсыз жаңалықтарды да қалт жібермейді екен.
Сонымен қатар ол қоғамда әділетсіздік болса, оған депутаттар да араласатынын атап өтті.
"Егер әділетсіздікті көрсек, оған әрқашан араласамыз. Бірақ біз оны ашық түрде жарияламаймыз. Жағдайды ушықтырғымыз келмейді. Салалық министрліктермен бір деңгейде ақылдасамыз. Менің ойымша, мұндай жұмыстар талап етіп, айғайлағанға қарағанда конструктивті және нәтижелі болмақ", - деді депутат.
Журналистер Дариға Назарбаевадан неліктен елімізде сөз бостандығы рейтингісі төмендеп бара жатқанын да сұрады.
"Сіз қалай ойлайсыз? Бізде сөз бостандығы бар ма? Біздегі әлеуметтік желіде барлығы ашық жазылуда. Мен сіздің қандай рейтингті айтып тұрғаныңызды білмеймін. Сондай-ақ рейтингтерге көп сене беруге болмайды. Себебі, оны кім және қалай құрастыратынына байланысты. Сондықтан мен рейтинг қуатындарға сыни көзбен қараймын", - деді сенат депутаты клуарда.
