НҰР-СҰЛТАН, 29 қаңтар – Sputnik. Бек Эйр-дің құлаған ұшағының екінші ұшқышы неден көз жұмғанын сот-медициналық сараптама анықтайды. Бұл туралы ішкі істер министрінің бірінші орынбасары Марат Қожаев айтты, деп хабарлайды Sputnik Қазақстан тілшісі.
"Адам өлімінің кез келген фактісі бойынша қажетті сот-медициналық сараптама тағайындалады. Алдын ала мәлімет бойынша, ұшқыштың өліміне әуе апатынан алған жарақаты немесе басқа да криминалды фактілер себеп болмаған. Мәселе оның денсаулығында шығар, бәлкім. Бірақ мұның бәрін сот-медициналық сараптама нақты көрсетеді", - деді Қожаев мәжіліс кулуарында.
Ол сот-медициналық сараптама отыз күн ішінде жүргізілетінін атап өтті.
Сонымен қатар, Қожаев Бек Эйр ұшағының құлауына қатысты тергеу жүріп жатқанын айтты.
"Ондай істер ешқашан тез бітпейді. Кәдімгі жол-көлік оқиғасы да бір-екі, үш айға созылып кетеді. Ал ұшақ құлағанда, одан да қиын. Қазір сараптамалар жүргізіліп жатыр. Халықаралық авиация комиссиясының мамандары сол сараптамаларды қарап, бізге беруі керек", - деді министр орынбасары.
28 қаңтарда апатқа ұшыраған Bek Air ұшағының екінші пилоты Мейіржан Молдақұлов үйінде қайтыс болды.
Апаттан зардап шеккен ұшқыш 21 қаңтарда ауруханадан шығарылған.
Bek Air-де жаға ұстатарлық жайттар анықталды: ұшақтардың суреті жарияланды
Мейіржан Молдақұлов ұшақ апаты кезінде ауыр жарақат алған. Сол кезде ол Алматы қаласының №4 клиникалық ауруханасына жеткізілген. Оған бірнеше ота жасалды, омыртқасына да операция істелді.
Бесінші қаңтарда Молдақұлов отадан кейін есін жиды. Сөйтіп, салалық бөлімшеге ауыстырылды.
Молдақұлов 1965 жылы 4 мамырда дүниеге келген.
Алматы түбіндегі ұшақ апаты
Ұшақ апаты 2019 жылдың 27 желтоқсанында таңғы сағат жетіде болды. Bek Air әуе компаниясының "Алматы – Нұр-Сұлтан" бағытындағы Fokker 100 ұшағы Алматы маңына құлады.
Ұшақта 93 жолаушы мен 5 экипаж мүшесі болған. Апат 12 адамның өмірін қиды, қаза болғандардың ішінде ұшақ командирі бар. Екінші пилот жансақтау бөліміне түскен.
Президент тапсырмасымен премьер-министр жетекшілік ететін комиссия құрылды. Тоқаев апаттың себебін анықтап, кінәлілерді қатаң жазалауды тапсырды. 28 желтоқсан елімізде жалпыұлттық аза тұту күні болды.