АСТАНА, 1 ақпан — Sputnik. Америка Құрама Штаттарында ірі спорттық ұйымдарға қатысты тергеу басталды, деп жазады New York Times.
Тергеушілер Халықаралық футбол федерациясы (ФИФА), Халықаралық олимпиада комитеті (ХОК) және АҚШ-тың ұлттық олимпиадалық комитеті қызметінің айқындылығына күмән келтірген.
АҚШ-тың әділет министрлігі ірі спорттық жарыстар кезінде ақшаның ізін жасыру және алаяқтық жайттары әрі жарысты өткізуші қалаларды таңдау кезінде бұрмалаушылық болды деп санайды.
"Сот күн тәртібіне сәйкес, тергеушілер белгілі бір елдерде спорттық ұйымдарға көмектесіп, өзінің мүддесін алға тартқан Helios Partners компаниясының жұмысын зерттеп жатыр. Helios Partners Олимпиада-2014 жарысын өткізуші қала ретінде Сочидің таңдалуы үшін Ресейге көмектесті деген күдік бар және 2018 жылғы футболдан әлем чемпионатын ұйымдастырушы ел ретінде таңдалуына жәрдемдескен болуы мүмкін", — деп жазады газет.
